Një delegacion i Misionit të OSBE-së në Shkup, në përbërje, Gonzalo de Cesare, Sara Barbieri dhe Tatiana Temellkoska sot realizuan takim pune me drejtorin e ri të Agjencisë për realizimin e të drejtave të bashkëvsive (ARDB), Ilhan Rahman dhe zëvendës drejtorin, Xhelal Hoxhiq, përcjell Telegrafi Maqedoni.
Në këtë takim pune është arritur marrëveshje për formimin e Komisionit të përbashkët të Agjencisë për realizimin e të drejtave të bashkësive dhe Misionit të OSBE-së në Shkup, që nga java e ardhshme. Ky komision duhet të përgatisë Memorandum për bashkëpunim dhe mirëkuptim. Në takim u bisedua edhe për nevojën për aktivizimin e Forumit participativ të bashkësive nën 20 për qind, si dhe nevojën për bashkëpunim në aktivitete tjera.
Si pjesë e këtyre aktiviteteve drejtori Rahman theksoi përgatitjen e analizave të rregullta nga sfera e arsimit, kulturës, përfaqësimit adekuat dhe të drejtë, përdorimit të gjuhëve të bashkësive si dhe përmirësimin e marrëdhënieve ndërmjet organizatave qytetare që punojnë në sferën e avancimit të të drejtave të bashkësive./Telegrafi/