Ambasadori i Shteteve të Bashkuara të Amerikës në Kosovë, Greg Delawie, i shoqëruar nga Drejtori i misionit të USAID-it James Hope, sot do të marrë pjesë në përurimin solemn të linjës së re prodhuese në Fabrikën e këpucëve “Solid” në Suharekë, njoftoi Ambasada amerikane.
“Solid”, prodhuesi i parë i këpucëve në Kosovë, ka përfituar rishtazi një grant nga USAID-i për nisjen e një linje të re këpucësh për fëmijë. Aktiviteti i USAID-it – Fuqizimi i Sektorit Privat, përkrah krijimin gjithëpërfshirës të vendeve të reja të punës duke zhvilluar njëkohësisht kapacitetet e ofruesve lokalë të shërbimeve për të mbështetur sektorin privat të Kosovës në fushat e zgjedhura si: përpunimi i drurit, tekstili, teknologjia e informacionit dhe e telekomunikimit (ICT), efikasiteti energjetik dhe turizmi në natyrë, thuhet në njoftim.
Ceremonia zyrtare është paraparë për në ora 14:00 në fabrikën e këpucëve “Solid” në Suharekë. /Telegrafi/