Alessandro Del Piero dëshiron që Leicester City ta fitojë Ligën Premier duke qenë se ky do të ishte një moment interesant në botën e futbollit.
Skuadra e Claudio Ranierit mezi siguroi mbijetesën në edicionin e kaluar, ndërsa këtë sezon është shumë pranë ta fitojë titullin dhe mund të shpallet kampion në rast se e mposht Manchester Unitedin në Old Trafford këtë fundjavë.
“Leicesteri është shumë më pranë titullit të Ligës Premier”, ka thënë legjenda e Juventusit për Sky.
“Vërtet shpresoj që të përfundojë në mënyrën që të gjithë duam, sepse kjo është diçka që mund t’ua thuash nipërve. Dëshmon se asgjë nuk është e pamundur në sport”, ka shtuar ai.
Njëherësh, ikona e Zonjës së Vjetër nuk mundur të mos e përmendë suksesin e Bianconerëve, të cilët fituan titullin e pestë radhazi në Serie A. /Telegrafi/