Aleanca për Ardhmërinë e Kosovës (AAK), dega në Junik, ka kërkuar nga Prokuroria hetimin e votave nga diaspora për Junikun, për shkak të dyshimeve se shumica e këtyre votave janë shënuar nga një person.
AAK ka ftuar prokurorinë dhe organet e hetuesisë të verifikojnë çdo votë të ardhur nga jashtë.
“Aleanca për Ardhmërinë e Kosovës dega në Junik, do ta ankimoj procesin e votimit që kanë ardhur përmes postës, pasi që siç është deklaruar edhe nga mediat, anëtarët e KQZ-së, etj., dyshohet se shumica absolute e votave me postë, janë shënuar nga një person, ashtu sikurse e kemi dëshmuar ditë më parë përmes fotos, ku shihet vëllai i kandidatit të LDK-së, Skënder Shehu, me një grumbull fletëvotimesh, si dhe fotot e mëposhtme të zarfeve të ardhura, ku shihet qartë se është e njëjta dorë, i njëjti drejtshkrim dhe i njëjti person që ka votuar në emër të qindra bashkatdhetarëve, e që është keqpërdorim, padyshim i vullnetit të qytetarëve”, thuhet në reagim.
Tutje, në reagim thuhet se ” kemi dyshime të bazuara dhe me argumente të fuqishme, që ky votim nuk është real, është i falsifikuar, si në raundin e parë, ashtu edhe në raundin e dytë, andaj i bëjmë ftesë prokurorisë dhe organeve të hetuesisë të verifikojnë çdo votë të ardhur nga jashtë”.
“Në të kundërtën, ky proces nuk mund të quhet legjitim dhe është i kompromentuar dhe qeverisja lokale e Junikut nuk mund të konsiderohet assesi legjitime”.
Ndryshe, në Qendrën për Numërim dhe Rezultate ka përfunduar numërimi i votave të ardhura nga diaspora për raundin e dytë të zgjedhjeve. Nga votat e diasporës, kandidati i AAK-së në Junik ka marrë 232 vota. /Telegrafi/
