Në intervistën e tij shumë të gjatë për SuperSport, Xhani De Biazi nuk kishte se si të mos fliste edhe për ato që ndodhën para Europianit.
Trajneri i Kombëtares shpjegoi përse la jashtë Berat Gjimshitin ku jep argumentin e tij, ndërkohë shprehet se mbeti i zhgënjyer nga lojtarët që zgjodhën më pas Kosovën. Ja fjalët e tij:
“Berati është një djalosh vërtet shumë inteligjent. E kuptoi që zgjedhja ime kishte të bënte me gjendjen e tij fizike jo në maksimum, pasi nuk kishte luajtur thuajse aspak me Atalantën, përveç pak ndeshjeve të fundit.”
“Prandaj fizikisht nuk ishte Gjimshiti që kishim parë në shtator në Danimarkë apo në ndeshjen e fundit të kualifikueseve ndaj Armenisë, ku ai ishte protagonist. Falë një shpirti të madh autokritik, e kaloi me sukses këtë situatë. Ai e dinte që ishte i rëndësishëm për ne dhe e kuptoi që zgjedhjet bëhen në të mirë të skuadrës dhe jo për t’i krijuar probleme atij.”
“Kurse tre të tjerët që mbetën jashtë Europianit më zhgënjyen me sjelljen e tyre. Fakti që i morëm në grumbullimin përgatitor do të thotë që i konsideronim të rëndësishëm dhe mund të ishin pjesë e kualifikueseve pasuese. Por ata vendosën të bëjnë zgjedhje të tjera dhe besoj se ne nuk humbëm asgjë”.