Martin Keown e ka kritikuar Arsenalin për transferimin e David Luizit në verën e kaluar, madje duke shkuar aq larg sa ka thënë se a është ai mbrojtës cilësor.
Braziliani kaloi te The Gunners nga rivali lokal Chelsea për dhjetë milionë euro, e që kishte befasuar të gjithë me atë marrëveshje.
Ikona e Arsenalit, Keown deklaroi se Luiz duhet të largohet nga klubi, pasi nuk është i denjë të vesh atë fanellë.
“David Luiz më shqetëson mua, pasi ju paguani dhjetë milionë euro për të me një pagë prej pesë milionë në sezon dhe ai do të jetë vetëm për një sezon aty”, ka thënë ai.
“A është ai mbrojtës cilësor? A mund të luajë ai në mbrojtje? Forma e tij më e mirë ishte kur fitoi Ligën Premier me Chelsean ën sezonin 2016/17”.
“Mikel Arteta duhet të ndryshojë gjërat dhe në mbrojtje të jenë tjerë lojtarë, jo mbrojtës që nuk dinë të mbrohen”, ka shtuar më tej Keown.
Përveç Luizit edhe Shkodran Mustafi lidhet me një largim, mirëpo braziliani është kritikuar shumë për formën e dobët që ka treguar. /Telegrafi/