Ditorja serbe Danas ka shkruar më 7 prill se Kosova po punon me vite në aktakuzën për gjenocid kundër Serbisë, ndërsa shton se nga Prishtina zyrtare dhe kërkesat individuale para gjykatave amerikane dhe evropiane, do të kërkohet dëmshpërblim për pronën e shkatërruar nga forcat serbe gjatë viteve 1998-1999.
Burimet diplmatike të ditores jozyrtarisht komentojnë se “akuzat për gjenocid do të komplikojnë procesin e dialogut në Bruksel”.
“Bashkëbiseduesit tanë veç paralajmërojnë që ky proces është në këmbë të xhamta”, shkruan Ditorja, që paralajmëron se ndërmjetësja e dialogut të Brukselit, Federica Mogherini, këtë muaj ose tjetrin do të ftojë palët nga Kosova dhe Serbia për raund të ri të bisedimeve, transmeton Telegrafi.
Më herët, ministri i Brendshëm serb, Ivica Daçiq, duke komentuar paralajmërimet për akuza për gjenocid, ka thënë se “Kosova nuk është anëtare e OKB-së dhe se nuk ka të drejtë të akuzojë Serbinë në Hagë”.
Sidoqoftë, Danas shkruan se nga burimet e saj nga Prishtina merr vesh se Kosova do ta kërkojë edhe fondin pensional të vjedhur më 1999 dhe do të kërkojë që Serbia të shpallet fajtore për gjenocid e të detyrohet të paguajë reparacione të luftës.
“Nga Serbia do të kërkohen 4-5 miliardë dollarë dhe për këtë proces do të angazhohen avokatët më të mirë në botë. Dëshmi ka me bollëk sepse do të përdoren të dhënat e Tribunalit të Hagës”, shkruan ditorja serbe. /Telegrafi/