Dukagjini nuk arriti të merrte më shumë se një pikë në shtëpi në përballjen ndaj Ballkanit në kuadër të javës së dhjetë në Superligën e Kosovës.
Skuadra nga Klina barazoi pa gola me atë nga Theranda, derisa tentojnë që të plasohen më lartë se sa fundi i tabelës.
Pas ndeshjes, trajneri Armend Dallku, është prononcuar për media dhe diskutoi ndeshjen në përgjithësi.
“Normalisht pika ndaj konkurrentit kryesor për të fituar titullin është shumë mirë. Ishte një ndeshje ku të dyja ekipet po frikësoheshin nga njëra-tjetra”, ka thënë trajneri i Dukagjinit për Art Sport.
“Puna e kartonëve të kuq na bënë të shqetësohemi. Nuk e di, maksimumi aty ishte vetëm një karton i verdhë. VAR-i sigurisht që ndihmon në zhvillimin e futbollit, por vetëm kundër nesh është duke përdorur ndryshe”.
“Nuk jam i kënaqur me grumbullimin e pikëve deri tash, por fazën e dytë e filluam në mënyrë pozitive ndaj një pretendetit që është për titull. Do tentojmë që të marrim në çdo ndeshje pikë të plota. Me dy-tre përforcime duhet të arrijmë objektivat tona, të cilat nuk përfshijnë fitimin e Superligës apo fitimin e Kupës”, përfundoi Dallku. /Telegrafi/