Qeveria zvicerane shpalli të hënën gjendje të jashtëzakonshme në vend për shkak të coronavirusit, ndërsa pritet të zgjasë deri më 19 prill, në mënyrë që të luftohet epidemia.
“Na duhet një reagim i fortë pasi është i nevojshëm për të gjithë vendin”, tha Presidentja zvicerane Simonetta Sommaruga në një konferencë për shtyp.
Sipas mediave të huaja, përcjell Telegrafi, të gjitha dyqanet, restorantet, baret dhe objektet argëtuese do të mbyllen, me përjashtim të dyqaneve ushqimore, barnatoreve dhe ambienteve shëndetësore.
Zvicra gjithashtu do të forcojë kontrollet e saj kufitare me Gjermaninë, Francën dhe Austrinë, pasi kishte ngritur kufizime në kufirin jugor me Italinë.
Qeveria aprovoi gjithashtu vendimin për të kërkuar ndihmën e 8,000 trupave për të ndihmuar në kantonet rajonale në spitalet e tyre, dhe në aspektet e sigurisë.
Raportohet se numri i të prekurve nga coronavirusi në Zvicër ka shkuar në 2,200, ndërsa 14 persona kanë ndërruar jetë.
“Duke pasur parasysh përhapjen e përshpejtuar të coronavirusit, Këshilli Federal po forcon më tej masat për mbrojtjen e popullatës”, tha qeveria në një deklaratë.
“Kjo klasifikon situatën në Zvicër si një ‘situatë të jashtëzakonshme’, e cila i mundëson asaj të miratojë masa kombëtare, domethënë identike për të gjitha kantonet”, thuhet në deklaratë.
“Të gjitha ngjarjet publike ose private janë të ndaluara që nga sot”, shtojnë autoritetet.
“Të gjitha dyqanet, tregjet, restorantet, baret, institucionet argëtuese, si muzetë, bibliotekat, kinematë, sallat e koncerteve, teatrot, qendrat sportive, pishinat dhe zonat e skive janë të mbyllura”, deklaron qeveria.
“Dyqanet ushqimore, stacionet e benzinës, hotelet, bankat dhe zyrat postare janë ndër objektet që do të qëndrojnë të hapura”, thuhet ndër tjerash në këtë vendim.
Qeveria e Zvicrës njoftoi të premten se do të ndajë 10.5 miliardë dollarë menjëherë për të ndihmuar kompanitë dhe punonjësit për ta përballuar këtë krizë. /Telegrafi/