Telegrafi

Coronavirus, kompania AstraZeneca e gatshme për furnizim me vaksina të mundshme në shtator

Kompania AstraZeneca ka njoftuar se është gati të sigurojë nga shtatori një vaksinë të re të mundshme të coronavirusit.

Sipas mediave të huaja, përcjell Telegrafi, firma tha se kishte lidhur marrëveshje për të ofruar të paktën 400 milionë doza të vaksinës, e cila po zhvillohet në Universitetin e Oksfordit.

Një testim fillestar është duke u zhvilluar ndërkaq AstraZeneca e pranoi që vaksina mund të mos funksionojë, mirëpo kompania tha se ishte e angazhuar për avancimin e programit klinik.

Shkencëtarët kanë paralajmëruar se një vaksinë kundër coronavirusit, mund të mos i japë imunitet të plotë njeriut, ndërsa kryeministri britanik, Boris Johnson,  ka paralajmëruar se një vaksinë mund të mos gjendet kurrë.

Megjithë këtyre pretendimeve, rreth 80 grupe në të gjithë botën janë duke punuar për një vaksinë të mundshme të coronavirusit.

AstraZeneca deklaroi se prodhimi do të zhvillohet në shumë vende, ndërkaq falënderoi qeverinë e Mbretërisë së Bashkuar dhe atë të SHBA-së, për mbështetje të konsiderueshme për të përshpejtuar zhvillimin dhe prodhimin e vaksinës.