Askush nuk do ta kishte menduar se pozita e Antonio Contes te Chelsea do të dridhej kaq shumë në fundin e një sezoni që riktheu titullin në Stamford Bridge.
Strategu italian është kritikuar tashmë dhe nga senatorët e klubit, të cilët nuk e kapërdinë dot largimin e Diego Costas me vetëm një SMS.
Sulmuesi i lindur në Brazil, i cili luan me kombëtaren spanjolle, bëri të ditur se trajneri nuk e do më te Blutë e Londrës, por mënyra sesi iu komunikua vendimi, ka ngjallur revoltë në dhomat e zhveshjes.
Shumë lojtarë flitet sipas shtypit, se kanë diskutuar me drejtuesit mundësinë e shkarkimit të Contes, një lëvizje e paprecedent edhe për standardet e Chelseat dhe manjatit rus Roman Abramovich, transmeton KP.
Jose Mourinho dhe Carlo Ancelotti u shkarkuan nga Chelsea pavarësisht suksesit, ndërsa titulli i parë i londinezëve në Ligën e Kampionëve, nuk ishte i mjaftueshëm për t’ia garantuar postin Roberto Di Matteos.
Conte ka fituar afeksionin e tifozëve pasi nga një vend i 10 në sezonin paraardhës e bëri Chelsean kampion.
Duket absurde që situata me Diego Costan të çojë në shkarkim, por kjo dhe ofertat në drejtim të trajnerit, mund të shkaktojnë largimin e tij.