Trajneri i Interit, Antonio Conte, ka thënë se skuadra e tij do ta respektojë Shakhtar Donetskun në gjysmëfinale të Ligës së Evropës, por do të dëshmojë se jo rastësisht ka arritur deri këtu.
Nerazzurrët do të luajnë kundër ukrainasve të hënën mbrëma në Dusseldorf, ndërsa fituesi do të përballet me Sevillan në finale.
“Shakhtari është një skuadër me plot talente dhe ka treguar ndër vite se mund t’i ndryshojnë trajnerët ose lojtarët, por gjithmonë rindërtohen dhe qëndrojnë në nivel shumë të lartë”.
“Ua heq kapelën atyre dhe drejtorëve të tyre që kanë qenë në gjendje të gjejnë vazhdimisht talentë. Mendoj se Shakhtari luan me forcën e vet, duke lëvizur nga presioni në mbrojtje dhe duke u përpjekur të kundërsulmojë. Kanë identitetin e vet shumë të qartë”.
“Ne jemi një skuadër që është përpjekur të vazhdojë rrugën pa i shikuar të tjerët. I kemi respektuar të gjitha garat ku kemi marrë pjesë, prandaj objektivi mbetet që të vazhdojmë të përmirësohemi”.
“Do të gëzohesha për klubin nëse Interi arrin ta fitojë trofeun. Nuk mendoj për suksesin tim personal, por për klubin që më angazhon ta kryej punën”, ka thënë Conte në konferencën për shtyp. /Telegrafi/