Ministri i Financave, Hekuran Murati, ka bërë të ditur se çmimet e grurit dhe vajit ushqimor në tregjet ndërkombëtare janë rikthyer në nivelet e para pandemisë.
Ai shtoi se edhe çmimet e deklaruara në Doganën e Kosovës pasqyrojnë këtë trend.
Megjithatë, ministri akuzoi opozitën për faktin që këto çmime ende nuk janë reflektuar në tregun e brendshëm.
“Qytetarët vazhdojnë të paguajnë bukën më shtrenjtë, sepse opozita e bllokoi Ligjin për Çmime Tavan në Gjykatë Kushtetuese,” shkroi Murati në një postim në Facebook.
Deklarata e tij nxiti reagime të ashpra nga opozita.
Deputetja e LDK-së, ish-ministrja e Financave, Hykmete Bajrami në përgjigje të Muratit, akuzoi qeverinë për keqmenaxhim dhe dyfytyrësi, duke përmendur një skandal të raportuar së fundmi.
“4 vjet tu vajtu, jeni për keqardhje. Po për 100 mijë euro të vëllait të Fitores, që e regjistron fermën veç katër ditë para se me e marrë grantin, kush po del fajtor? Opozita apo Gjykata Kushtetuese?” shkroi Bajrami.
Ndryshe u raportua se vëllai i deputetes së LVV-së, Fitore Pacolli, kishte përfituar një grant bujqësor prej rreth 100 mijë euro nga Ministria e Bujqësisë.
raportohet se biznesi përfitues ishte regjistruar vetëm katër ditë para se të shpallej fitues i grantit.
Tensionet politike mes qeverisë dhe opozitës rreth çështjeve ekonomike dhe skandaleve vazhdojnë të dominojnë diskursin publik, ndërsa qytetarët përballen me çmime të larta dhe mungesë transparence në treg./Telegrafi/
