Senatori demokrat amerikan, Chris Marphy, ka kritikuar cicërimën e fundit në Twitter të presidentit Donald Trump, rreth Koresë së Veriut.
Siç shkruajnë mediat e huaja, përcjell Telegrafi, ai beson se kjo cicërimë “ndoshta është më e rrezikshmja dhe më e papërgjegjshmja” që kur Trump erdhi në zyrën e Presidentit.
“Miliona jetë njerëzish janë vënë në pyetje, kjo nuk është një lojë”, ka shkruar Marphy në Twitter.
Mediat e huaja ndërkohë kanë njoftuar se Shtëpia e Bardhë nuk ishte e gatshme për të sqaruar mesazhin e Trump në Twitter, si dhe për të shpjeguar se çfarë donte të thoshte kur ai përmendi fjalën “zhvatje” në rastin e krizës së tanishme me programin bërthamor të Koresë së Veriut.
Ndryshe, Trump sot përjashtoi mundësinë e bisedimeve diplomatike me Korenë e Veriut, një ditë pasi Pheniani kishte gjuajtur një raketë balistike mbi Japoni, duke nxitur dënimin nga e gjithë bota.
“Shtetet e Bashkuara kanë biseduar me Korenë e Veriut dhe i kanë paguar para në formë zhvatjeje, për 25 vjet. Bisedimet nuk janë përgjigja!”
Ai tha dje se bota mori një mesazh nga Koreja e Veriut dhe se tani të gjitha opsionet janë në tryezë. /Telegrafi/