Pianisti i njohur Italian, Giovani Bellucci, performoi në natën përmbyllëse të edicionit të IX-të të “Chopin Piano Fest”.
Në këtë mbrëmje ai u shfaq në skenë bashkë me Orkestrën e Filarmonisë së Kosovës, në koncertin e drejtuar nga dirigjenti gjerman Brian Videnoff.
Drejtoresha e festivalit, Besa Luzha, tha se edhe ky koncert dëshmon nevojën për një sallë të koncerteve.
Koncerti po mbahet në Sallën e Kuqe të Pallatit të Rinisë, që është e mbushur përplot me adhurues të muzikës klasike. Disa madje kanë qëndruar në këmbë për ta përcjell përformancën e Bellucit.
Ardhja e pianistit u mundësua përmes bashkëpunimit të organizatorëve të festivalit me Ambasadën italiane në Prishtinë. Ambasadori italian, Piero Cristoforo Sardi, tha se është i lumtur që kanë arritur këtë bashkëpunim.
Në përmbyllje të festivalit ka marrë pjesë edhe ambasadori amerikan Greg Delawie dhe personalitete nga sfera diplomatike, artistike, politike dhe arsimore në Kosovë. /KP/