Janë zhvilluar gjashtë ndeshje në natën e mbrëmshme në elitën e basketbollit amerikan NBA.
Padyshim që takimi kryesor ishte mes Brooklyn Nets dhe Chicago Bulls, ku mysafirët kanë arritur fitore me katër pikë diferencë 107:111.
Ishte një ndeshje shumë interesante, ku Nets ishin në epërsi gjatë tre çerekëve të parë, por Bulls bën rikthimin e madh në fundin e ndeshjes.
Zach LaVine ka qenë i jashtëzakonshëm në këtë duel për Chicagon me 31 pikë të shënuara, tetë kërcime e gjashtë asistime.
Me lojë të mirë u dallua DeMar DeRozan që shtoi 29 pikë, gjashtë kërcime e tre asistime, derisa me pikë dyshifrore e mbyllën edhe Vucevic dhe Dosunmu që shtuan nga 11 pikë.
Kevin Durant ishte më efikasi tek Nets, që realizoi 28 pikë, 10 kërcime e katër asistime, por që nuk mjaftuan për fitore.
Për Chicagon kjo ishte fitorja e dytë ndaj Nets këtë edicion, derisa Bulls tani ndodhen në vendin e dytë në Lindje me 16 fitore e tetë disfata.
/Telegrafi/
