Vladimir Putin ka tërhequr 1.140 ushtarë dhe 13 avionë luftarakë nga Siria gjatë ditëve të fundit në një shkallë të madhe të uljes së pranisë ushtarake të Rusisë.
Duke folur në një takim me të diplomuarit e shkollave ushtarake, shkruajnë mediat e huaja, përcjell Telegrafi, Putin njoftoi të enjten tërheqjen e ushtarëve rusë, avionëve luftarakë dhe helikopterëve nga vendi i shkatërruar nga lufta.
Rusia ka mbështetur presidentin sirian Bashar al-Assad me “çizme në terren” dhe avionë ushtarakë në luftën kundër ISIS-it dhe rebelëve që nga shtatori 2015.
Dhe siç shkruajnë mediat e huaja, tërheqja shënon një kthesë të madhe në përfshirjen e Rusisë në konflikt, të cilën vendet perëndimore e kanë parë si një pengesë për rrëzimin e Asadit nga pushteti.
“Siç e dini, ne kemi filluar tërheqjen e forcave tona gjatë vizitës sime në bazën Hmeimim. Kjo tërheqje vazhdon tani”, ka thënë Putin në një ceremoni në Kremlin të enjten.
“Në ditët e fundit janë tërhequr 13 avionë, 14 helikopterë dhe 1,140 personel”.
Në dhjetor të vitit të kaluar, Putin urdhëroi tërheqjen e trupave nga Siria pas njoftimit të humbjes së ISIS në një vizitë të papritur në bazën Hemeimeem të Rusisë.
Rusia nisi një fushatë ajrore kundër rebelëve dhe militantëve të ISIS kur Assad ishte praktikisht në prag të largimit nga pushteti.
Por ndërhyrja e Putinit, e cila kryesisht përbëhej nga sulme ajrore, ka ndryshuar rrjedhën e konfliktit në favor të Asadit.
Presidenti sirian Bashar al-Assad ka bërë fitime të mëdha territoriale në muajt e fundit në luftën civile shtatëvjeçare kundër forcave rebele që kërkojnë ta rrëzojnë atë.
Por konflikti arriti kulmin e etheve në prill kur Assad u akuzua për përdorimin e armëve kimike kundër rebelëve dhe civilëve në Douma, Ghouta Lindore.
Në përgjigje, SHBA, Britania dhe Franca morën masa ushtarake kundër regjimit të Assadit, duke bombarduar një numër të bazave të dyshuara të armëve kimike. /Telegrafi/