Lidhja e Historianëve të Kosovës “Ali Hadri”, dega në Deçan, ka kërkuar që çështja e Manastirit të Deçanit mos të jetë temë në dialogun Kosovë-Serbi, pasi konsiderojnë se kjo duhet të rregullohet me ligje të Kosovës.
Lidhja e Historianëve po ashtu kanë kundërshtuar ashpër ndërprerjen e punimeve të rrugës Deçan- Plavë.
Kryetari i Lidhjes së Historianëve të Deçanit, Shkodran Imeraj në një konferencë për medie e cilësoi si tragjike arsyetimin e kryeministrit, Avdullah Hoti për ndërprerjen e punimeve.
“Kjo çështje nuk duhet të diskutohet në bisedimet e ardhshme që do të zhvillohen në Bruksel në muajin shtator, ashtu siç janë paralajmëruar. Ne konsiderojmë se Manastiri i Deçanit, gjegjësisht udhëheqësit e këtij institucioni janë duke u menduar të futin manastirin në një situatë të re politike duke fituar poenë politikë dhe strategjikë në kuptimin që patjetër t’i marrin pronat e ndërmarrjeve. Ne i kërkojmë kryeministrit që mos të diskutojë këtë çështje sepse në fund të fundit kjo është çështje që duhet të rregullohet me ligje të Kosovës”, tha ai.
Imeraj tha se vendimi i Gjykatës Kushtetuese në vitin 2016 për Manastirin e Deçanit është anti-ligjor dhe kushtetues.
“Çka është edhe më tragjike për ne ka qenë edhe deklarata e mbrëmshme e Qeverisë së Kosovës, gjegjësisht e kryeministrit Avdullah Hoti i cili ka kërkuar zbatimin e vendimit anti-kushtetues dhe anti ligjor të Gjykatës Kushtetuese të Kosovës në maj të vitit 2016. Të cilin pronat dhe ndërmarrjet Apiko dhe Iliria i njihen në pronësi të Manastirit të Deçanit. Këtu janë dy veprime të gabueshme që i ka ndërmarrë edhe Serbia, por edhe kryeministri i Kosovës”, u shpreh ai.
Ndërkohë, i dha mbështetje të plotë kryetarit të komunës së Deçanit, Bashkim Ramosaj që punimet sa më shpejtë të rifillojnë.
“Ne konsiderojmë se rruga Deçan-Plavë nuk është e rëndësishme vetëm për Kosovën dhe Malin e Zi, por për gjithë rajonin e Ballkanit dhe integrimet tona euro-atlantike”, shtoi ai, transmeton KP. Rruga Deçan-Plavë është ndërprerë vikendin e kaluar pas kundërshtimeve të vet manastirit, por edhe presidentit serb, Aleksandër Vuçiq.