Forca e Sigurisë së Kosovës (FSK) ka bërë të ditur se tashmë është përmbyllur me sukses “Kursi Bazë për Snajper” në Komandën e Doktrinës dhe Stërvitjes (KDS).
“Kursantët u trajnuan dhe u testuan në distanca dhe kalibre të ndryshme të qitjeve”, thuhet në njoftimin e FSK-së.
Ushtaraku dhe eksperti i sigurisë, Hysen Gecaj, këtë e ka cilësuar si lajm të mirë për Kosovën dhe FSK-në, sepse siç tha, dita-ditës kapacitetet operacionale të FSK-së po shtohen dhe po rriten në kuadro profesionale në të gjitha nivelet.
“Ky lajm më i riu për snajperistët është një lajm i mirë, për shkak se këto njësi kanë munguar deri më tani, gjegjësisht këta ekspertë, pra snajperistët i kanë munguar FSK-së si një aset i veçantë për njësitë e këmbësorisë, të cilat janë të domosdoshme në luftërat bashkëkohore, sepse trajnimi i grupeve të tilla apo edhe i individëve të tillë rrit kapacitetet operuese apo të veprimit në terren të njësive të këmbësorisë, rrit saktësinë në qitje dhe në arritjen e objektivave”.
“Kështu që ky trajnim dhe avancim i këtij grupi fillestar tani që e ka përfunduar trajnimin si snajperistë, është një lajm i mirë për FSK-në, ndonëse dihet që FSK-ja deri më tani ka bërë shumë trajnime të llojeve të ndryshme, dhe ky është njëri prej tyre në vazhdën e shumë trajnimeve të tjera”, deklaroi Gecaj për Klan Kosova.
Ai tutje shtoi se përkundër faktit që ky është një lajm i mirë, “FSK-ja ende ka nevojë për kapacitete shtesë të llojit të këtillë, dhe për avancime të mëtutjeshme, sepse këto trajnime kanë nivele të ndryshme të përgatitjeve. Kështu që me siguri FSK-ja i ka paraparë në planin dhe konceptin e vetë të njësive që të zhvillojë dhe të shtojë numrin e snajperistëve, në mënyrë që njësitë të jenë të kompletuara me snajperistë të të gjitha niveleve të nevojshme për nevojat eventuale të FSK-së”, shtoi ai.