Casemiro i është lutur Cristiano Ronaldos që të qëndrojë në Manchester United përpara lëvizjes së tij në Old Trafford.
Mesfushori 30-vjeçar i është bashkuar Unitedit në një marrëveshje me vlerë deri në 70 milionë euro nga Real Madrid dhe u prezantua në derbin me Liverpoolin në “Old Trafford”.
Casemiro luajti së bashku me Ronaldon te Reali dhe ai shpreson të ribashkohet me sulmuesin ‘të jashtëzakonshëm’ në Mançester, pasi fitoi një mori trofesh përkrah portugezit, përfshirë katër tituj të Ligës së Kampionëve.
Braziliani i dha një lamtumirë emocionale Real Madridit gjatë një konference për shtyp të hënën në mëngjes dhe ai u pyet për situatën e Ronaldos në United.
Ai lavdëroi yllin portugez, duke thënë: “Nuk kam folur me Cristianon, shpresoj që ai të qëndrojë sepse është një nga lojtarët më të mirë të gjithë kohës. Ai është i pabesueshëm”.
“Dua të sjell vlerat e mia në Manchester United, gjithçka që më ka mësuar te Real Madridi, për të fituar nga dita në ditë, nga çdo seancë stërvitore”.
Ronaldo i tha klubit se donte të largohej në fillim të kësaj vere dhe humbi pjesën më të madhe të para-sezonit, i etur për t’u larguar nga Old Trafford për një ekip që luan në Ligën e Kampionëve. /Telegrafi/