Megjithëse janë ndarë 25 milionë euro në përputhje me Ligjin për të rënët, invalidët, luftëtarët e Ushtrisë Çlirimtare të Kosovës, ku përfshihen edhe viktimat e dhunës seksuale gjatë luftës, ato nuk u janë shpërndarë përfituesve, për shkak të mos krijimit të një Komisioni Qeveritar.
“Problemi qëndron se këto mjete nuk mjaftojnë as për veteranët”, thotë zëvendësministri i Financave në Qeverinë e Kosovës, Agim Krasniqi.
Në fundjavë në Prishtinë është organizuar një protestë mbështetëse e organizatave joqeveritare për viktimat e dhunës seksuale gjatë luftës, me të cilën është kërkuar që të përshpejtohen të gjitha proceset për këtë kategori të shoqërisë në Kosovë.
Përfaqësues të shoqërisë civile që janë marrë me trajtimin e këtyre personave, thonë se viktimat e dhunës seksuale gjatë luftës në Kosovë, janë të zhgënjyera nga institucionet e vendit.
Legjislacioni ku përfshihen viktimat e dhunës seksuale gjatë luftës në Kosovë ka për qëllim rregullimin ligjor të statusit të viktimave, të cilat i kanë mbijetuar abuzimit seksual dhe dhunimit gjatë periudhës së 27 shkurtit 1998 e deri më 20 qershor të vitit 1999.
Sipas ligjit, del se pensionet për personat e dhunuar gjatë luftës të jenë 300 euro, ndërsa këtë shumë besohet se mund ta përfitojnë 20 mijë viktima të abuzuara. /REL/