Hapësirat e brendshme të Qendrës së Paraburgimit të Gjilan do të ndryshojnë së shpejti, në mënyrë që t‘i përshtaten sipas kërkesave të Danimarkës.
Danimarka ka marr me qira 300 qeli burgu në Gjilan, të cilat pritet t’i marrë në shfrytëzim nga pranvera e vitit 2023. Deri atëherë në ambientet e burgut do të bëhen shumë ndryshime.
Objektit do t’i shtohen disa hapësira, derisa do të ketë edhe përshtatje të dhomës së vizitave.
“Do të ketë ndryshime thelbësore sa i përket hapësirave të banimit. Do të ketë aktivitete trajnuese dhe edukuese”, deklaroi për RTV Dukagjinin, Alban Muriqi – këshilltar në Ministrinë e Drejtësisë.
Muriqi thotë se punimet do të fillojnë vetëm pasi marrëveshja të miratohet në Kuvendin e Kosovës.
“Me ratifikimin e këtyre marrëveshjeve në Kuvendin e Kosovës, punimet në Gjilan do të fillojnë shumë shpejt, derisa nga pranvera e vitit të ardhshëm mund edhe të fillojë transferimi i të burgosurve”, deklaroi tutje Muriqi.
Qendra e burgimit që ndodhet në fshatin Pasjak të Gjilanit do t’i ketë rreth 200 punonjës, derisa një pjesë e tyre do të jenë kosovarë.
Pjesë e stafit të burgut do të jenë edhe guvernatori dhe dy zëvendësguvernatorë.
Nga kjo marrëveshje Kosova pritet t’i fitojë rreth 200 milionë euro./Telegrafi/