Ministri i Punëve të Jashtme, Bujar Osmani bëri të ditur se në kuadër të Dialogut Strategjik RMV – SHBA, po punohet për thellimin e bashkëpunimit mes bizneseve të dy vendeve.
Ministri Osmani theksoi se gjithashtu po punohet në krijimin e një linje direkte ajrore Shkup – New York, njofton Telegrafi Maqedoni.
“Në kuadër të Dialogut Strategjik ndërmjet Maqedonisë së Veriut dhe ShBA-së, në fushën “Tregtia dhe investimet” po punohet në: Organizimin e një Forumi të madh biznesi ndërmjet dy vendeve, me qëllim tërheqjen e investitorëve të huaj nga SHBA dhe rritjen e shkëmbimit tregtar. Krijimin e linjës direkte ajrore Shkup – Nju Jork, e cila do të rezultojë në afrimin e mëtejshëm të vendeve, forcimin e bashkëpunimit ekonomik dhe lidhjeve të biznesit”, u shpreh Osmani.
Kujtojmë se disa ditë më herët, ministri Osmani u shpreh se në kuadër të Dialogut Strategjik RMV – SHBA, një ndër fushat është edhe heqja e regjimit të vizave nga SHBA për shtetasit e Maqedonisë së Veriut./Telegrafi/
