Analisti amerikan Janusz Bugajski vlerëson se Shkupi është bastioni i ri rus në Ballkan dhe konsideron se Maqedoni do të bëhet Republika e re Serbe.
“Nëse bllokohet rruga e Maqedonisë drejt institucioneve perëndimore, tensionet kombëtare do të rriten në gjithë rajonin. Kremlini do të investojë energji shtesë që t’i rrezikojë arritjet demokratike të Ballkanit Perëndimor, ndërsa BE-ja dhe NATO-ja do të jenë gjithnjë e më larg”, tha analisti amerikan Janusz Bugajski, përcjell Telegrafi Maqedoni.
Ai për gazetën malazezase “Pobjeda” tha se dalja e ulët në referendum e solli në pikëpyetje marrëveshjen me Greqinë, por edhe derën e hapur të NATO-s dhe BE-së.
“Nëse marrëveshja nuk përkrahet, shteti gjithnjë e më shumë do të shkojë në radikalizim etnik, jo-stabilitet rajonal dhe ndërhyrje e Moskës. E vetmja dalje janë të ketë zgjedhje në muajin nëntor, edhe pse edhe ky është propozim i rrezikshëm duke parë parasysh se nacionalistët janë të inkurajuar nga bojkoti i referendumit”, tha Bugajski.
Sipas tij, nacionalizmi dhe separatizmi do ta bëjnë shtetin të ndjeshëm ndaj Rusisë. Rusia në Maqedoni sheh bastion të saj për luftimin e NATO-s dhe BE-së. Kremlini, thotë ai, mund ta konsiderojë se Maqedonia mund të bëhet Republika e dytë Serbe./Telegrafi/