Kryetari i Bashkimit të Sindikatave të Pavarura të Kosovës, (BSPK), Haxhi Arifi gjatë një konference për media tha se punëtorët gjithmonë shfrytëzohen për përfitime të politikanëve dhe pas zgjedhjeve nuk merret askush me ta.
“Do t’i bojkotojmë zgjedhjet nëse nuk merren më seriozisht me punëtorët këta deputet dhe ministra në të ardhmen”, tha Arifi.
Mos funksionimi i Këshillit Ekonomiko Social, sipas tij, është duke krijuar vështirësi për punëtorët dhe të drejtat e tyre nuk janë duke u mbrojtur.
“Ligji i Punës është Kushtetutë për punëtorët dhe pa të nuk mund as të funksionojmë. Deri tash janë përdor arsye më banalet për mos miratim të tij, e tash e mbas nuk do t’ua falim sepse është bërë tepër”, theksoi kryetari i BSPK-së Haxhi Arifi.
Edhe kryetari i Federatave të Sindikatave të Shëndetësisë së Kosovës, Blerim Syla tha se gjendja e punëtorëve shëndetësor është tepër e rënde dhe sipas tij, deri më tani nuk është bërë asgjë në përmirësimin e kushteve të tyre. /Telegrafi/