Boston Celtics ka shënuar fitore “si burrat” në duelin ndaj Cleveland Cavaliers me rezultat 102-88, kurse performancë fenomanle pati Stephen Curry në fitoren e Golden State me rezultat 125-122 ndaj Dallas Mavericks.
Bostoni arriti që me mbrojtje të fortë të gjunjëzojë mysafirët në këtë takim në atë që sipas shumë analistëve do të jetë finalja e këtij viti në konferenën lindore.
Bostoni e kufizoi në vetëm 32% nënkampionin në gjuajtjet, kurse Cavs vuajtën me vetëm tetë treshe nga 32 tentime.
Më i miri ishte LeBron James me 19 pikë, kurse Love zhgënjeu me vetëm dy pikë të shënuara në këtë duel.
Bostoni tregoi veten me plot gjashtë lojtarë që shënuan pikë dyshifrore, kurse u dallua Terry Rozier me 20 pikë dhe i riu Jayson Tatum me 15 pikë të shënuara. Irving shtoi vetëm 11 pikë.
Golden State Warriors vazhdoi me fitore pas rikthimit të Curryt, ku viktima e radhës ishte Dallas Mavericks.
Skuadra teksane arriti të bëjë rezistencë të jashtëzakonshme ndaj kampionit aktual.
Megjithatë, me më pak se 10 sekonda lojë të mbetur, ishte Curry ai që pas një blloku doli në maje të perimetrit për të shënuar për tri pikë dhe pikët vendimtare që ja siguruan fitoren ekipit të tij.
Curry shënoi 32 pikë në këtë takim bashkë me 8 asistime tjera që bëri, kurse Thompson dhe Durant shtuan nga 25 pikë, ky i fundit me “double double”.
Pas ndeshjeve të mbrëmshme, Bostoni ka kreun e tabelës me pesë fitore më shumë se sa Clevelandi dhe tri fitore më shumë se Toronto që gjendet në vendin e dytë, kurse në Perëndim, Golden State është dy fitore para Houstonit dhe pesë fitore para San Antonios.
/Telegrafi/