Borea, projekti për Kosovën e bukur tani ka marrë hapat e parë të zhvillimit. Borea, ka marrë emrin e hyjneshës ilire të borës.
Kryetari i Pejës, Gazmend Muhaxheri në “Rubikon” të KTV-së ka thënë se një qendër me kushte të tilla nuk e ka asnjë nga qendrat turistike në rajonin e Ballkanit, transmeton Koha.net.
“Parakushti për jetësimin e projektit ka qenë që pjesa ku do të ndërtohet të jetë pjesë e komunës së Pejës”, ka thënë ai.
Projekti me një potencial tejet të madh të zhvillimit do të kushtoj rreth 50 milion euro. “Nëse rrethanat buxhetore do të jenë mirë atëherë qendra do të shkoj në rritje”, ka thënë ai.
Projekti do të përkrahet nga buxheti i investitorëve të cilët janë të interesuar për financim. “Projekti i vjetër nuk është realizuar për shkak të rrethanave politike”, ka thënë Muhaxheri, duke shtuar se është i sigurt që shtatori do të jetë muaji vendimtar që do të sjellë kompaninë që do të punoj mbi projektin.
Ai ka thënë se dështimi i Brezovicës dhe ambiciet e larta i kanë shërbyer si mësim për të projektuar një qendër me financim më të ulët. Interesim për financim, sipas Muhaxherit, kanë shprehur kompanitë nga Turqia e Kanadaja mirëpo nuk përjashton edhe bizneset vendore të cilat kanë potencial për të mbështetur projektin, ka thënë ai.