Një votim i paprecedent është bërë nga Kuvendi i Kosovës në seancën e së enjtes.
Është votuar Bordi prej tetë anëtarëve i Agjencisë Kosovare të Privatizimit, duke u mbështetur në një ligj i cili ende nuk është i plotfuqishëm, shkruan sot Koha Ditore.
Votimi i tetë anëtarëve të bordit është në kundërshtim me Ligjin e AKP-së, që aktualisht është në fuqi.
Deputetët i kanë votuar kandidatët në bllok, ndërsa kryeparlamentari Kadri Veseli vendosi që as të mos i lexojë emrat e tyre para se t’i hedhë në votim.
Pesë nga tetë anëtarët e zgjedhur të Bordit të AKP-së janë emra politikë të partive në pushtet, PDK e LDK.
Me votimin e tetë anëtarëve është shkelur paragrafi i dytë i nenit 8 të Ligjit të AKP-së, i cili i jep kompetencë Kuvendit që të emërojë vetëm pesë anëtarë të Bordit të AKP-së. Kurse, paragrafi i tretë i nenit 8 thotë se tre anëtarët e tjerë të Bordit emërohen nga Përfaqësuesi Civil Ndërkombëtar. /Telegrafi/