Sot ka vazhduar gjykimi për rastin “Haraçi”, ku i akuzuari i parë Bojan Jovanovski “Boki 13” ka paraqitur mbrojtjen e tij.
Ai ka folur për marrëdhëniet e tij me ish-prokuroren e PSP-së Katica Janeva, djalin e saj Llazar Janev, si dhe mënyrën se si janë njohur, përcjell Telegrafi Maqedoni.
Gjatë gjykimit, Boki 13, Janevën e vlerësoi si person popullor, grua liberale e cila nuk ka paragjykime, pasi nuk i ka penguar orientimi seksual i tij.
Boki 13 foli edhe për marrëdhëniet me Zoran Milevskin – Kiçeec, me të cilin njihet që 15 vjet. Ai tha se marrëdhëniet me Kiçeecin i ka intensifikuar kur ky i fundit ka dashur të takohet me Orce Kamçevin.
“Me Janevën kemi folur edhe për punët e mia të dashurisë, por asnjëherë nuk i kam thënë çfarë të punojë dhe si. Për lëndën ‘Perandoria’ dhe lëndët tjera, jam informuar këtu në gjykatë. Me Janevën jam njoftuar në shtator 2018, kur e ftova si mysafire në 1TV, më pas kishim takim në PSP. Qëllimi ishte që ta tregonte jetën e saj në emisionin ‘Lica’ (Persona). Llazar Janevin për herë të parë e kam parë në fotografi, ndërsa ajo më tha se është jurist dhe i papunë. Atëherë i ofrova të punojë tek ne”, tha Boki 13.
Ai foli edhe për marrëdhëniet me prokuroren Villma Ruskovska, për të cilën tha se ka pasur disa takime, derisa kishin konsumuar edhe alkool.
““Në zyrën time isha me Villma Ruskoskën. Kemi biseduar në katër sy. Kemi konsumuar alkool, kafe. Unë nuk konsumoj alkool, por e tillë ishte atmosfera”, ka thënë Boki 13./Telegrafi/