Blake Lively ka ngritur një padi ndaj Justin Baldonit, duke pretenduar se regjisori dhe bashkëaktori i saj ka krijuar një mjedis toksik dhe ka bërë sjellje të papërshtatshme gjatë xhirimeve të filmit “It Ends With Us”.
Sipas dokumenteve gjyqësore, Baldoni është akuzuar për improvizime intime pa paralajmërim, përfshirë një incident ku ai dyshohet se ka thithur buzën e poshtme të Lively-t gjatë një skene, pavarësisht shqetësimit të saj të dukshëm.
Ai gjithashtu është akuzuar për bërjen e komenteve seksuale dhe përpjekjet për të shtuar skena intime në film pa pëlqimin e saj, shkruan DailyMail.
Padia përfshin gjithashtu pretendime se Baldoni dhe producenti Jamey Heath hynin në mënyrë të paautorizuar në hapësirat private të Lively-t gjatë xhirimeve. Heath akuzohet gjithashtu për presion ndaj Lively-t për të simuluar lakuriqësi në një skenë lindjeje dhe për tregimin e përmbajtjeve grafike pa miratimin e saj.
Lively pretendon se ka kërkuar ndryshime dhe masa mbrojtëse, duke përfshirë praninë e një koordinatori intimiteti në set.
Baldoni ka mohuar të gjitha akuzat, ndërsa konflikti ka nxjerrë në pah tensionet mes aktorëve gjatë promovimit të filmit.
Ndërkohë, Lively akuzon Baldonin për nisjen e një fushate shpifjeje ndaj saj pas ngritjes së shqetësimeve, duke pretenduar se kjo kishte për qëllim dëmtimin e reputacionit të saj. Rasti vijon të tërheqë vëmendje të gjerë në publik dhe në industrinë e filmit. /Telegrafi/
