Gjatë kësaj mbledhje, Kuvendi i OEK-ut ka konstatuar se mungon angazhimi konkret në inkurajimin e investitorëve të huaj për të investuar në Kosovë dhe se nuk është bërë sa duhet në luftimin e ekonomisë informale dhe krijimin e një ambienti të volitshëm për zhvillim ekonomik.
"Ndër lëvizjet pozitive në ekonominë e Kosovës u theksuan privatizimi i shpejtuar, vazhdimi i rritjes së depozitave dhe kredive në banka dhe në planin afatmesëm nënshkrimi i marrëveshjes së CEFTA-së", ka konstatuar Kuvendi i OEK-ut.
Sa i përket raportit gjashtë mujor të punës së OEK-së, është theksuar se në bazë të kapaciteteve profesionale dhe eksperiencës së fituar të gjitha aktivitetet e saj në fokus e kanë klientin, gjegjësisht anëtarin e OEK-ut.
"Shumica e aktiviteteve janë dizajnuar në bazë të kërkesave të anëtarësisë së gjerë dhe vlerësimeve pozitive nga viti i kaluar. Me rastin e planifikimit është marr parasysh që aktivitetet të jenë të shtrira nëpër regjione ashtu që të jemi më gjithëpërfshirës dhe të jemi prezent në tërë Kosovën" thuhet në raportin e punës së OEK-së.
Ndërsa sa i përket aktiviteteve të OEK-ut , është konkluduar se edhe në të ardhmën duhet të kenë fokus në aktivitetet e lobimit, analizat ekonomike, të ketë komunikim me ambasadat e huaja në Prishtinë dhe jashtë, bashkëpunim me institucionet e Kosovës, odat ekonomike jashtë vendit, si dhe bashkëpunimi me organizatat ndërkombëtare dhe donatorët. /Telegrafi/