Presidenti i SHBA-së, Joseph Biden tha në samitin e klimës COP26 të OKB-së në Glasgou se kjo dekadë është vendimtare për luftën kundër ndryshimeve klimatike dhe se Shtetet e Bashkuara dhe vendet e tjera të zhvilluara mbajnë pjesën më të madhe të përgjegjësisë për ndryshimet klimatike.
“Askush prej nesh nuk mund t’i shpëtojë më të keqes që na pret nëse nuk arrin të shfrytëzojë këtë moment”, tha Biden.
Ai e sheh krizën nëpër të cilën po kalon planeti, të mishëruar në përmbytje, kushte të paqëndrueshme të motit, thatësira dhe zjarre, si një mundësi unike për të ripërcaktuar ekonominë globale.
Duke iu drejtuar udhëheqësve botërorë të mbledhur në Skoci, Biden ka treguar kostot e mëdha që shoqërojnë kufizimin e emetimeve të dioksidit të karbonit si një mundësi për të krijuar vende të reja pune, për të kaluar te burimet e rinovueshme të energjisë dhe makinat elektrike.
Ai kërkoi falje për vendimin e ish-presidentit amerikan Donald Trump për t’u larguar nga Marrëveshja e Parisit dhe rolin që SHBA-ja dhe vendet e tjera të pasura luajtën në kontributin në zgjidhjen e çështjes së ndryshimeve klimatike.
“Ne që jemi përgjegjës për një pjesë të madhe të shpyllëzimit dhe të gjitha problemeve që kemi deri më tani, kemi detyrime të mëdha ndaj vendeve më të varfra përgjegjësia e të cilave është më pak për emetimin e gazrave të dëmshëm, por ato paguajnë çmimin për ngrohjen e planetit”, tha Biden.
Zyrtarët e administratës Biden kanë fajësuar Kinën se nuk po tregon përkushtim luftës kundër emetimeve të karbonit, ndërsa presidenti ende nuk ka arritur të zbatojë planin ambicioz të vendit të tij për klimën.
Biden nuk dha mbështetje për ligjin e propozuar, i cili kundërshtohet nga republikanët, por edhe nga disa demokratë në Kongres. /kp/Telegrafi/