Matësi që tregonte se sa borxh ka çdo qytetar për shkak të Qeverisë, nuk duhej të largohet në mënyrë të shpejtuar nga ASHAM-i, shprehet akademik Abdylmenaf Bexheti për Alsat-M.
Sipas tij, qytetarët kanë të drejtë të dinë se sa ka borxh Qeveria, e me këtë edhe çdo banor, nga foshnja e deri te i moshuari.
Dje matësi që tregonte se borxhi publik çdo sekondë rritet për tre euro dhe secili banor i Maqedonisë ka borxh nga 2.088 euro, është larguar pas kumtesës së VMRO-DPMNE-së ku e sulmuan ASHAM-in dhe kryetarin e saj Taki Fiti. Reagimi i këtillë i vrullshëm i pushtetit për matësin, sipas Bexhetit, është tentim që të fshihet se sa ka borxh shteti, por edhe të krijohet hapësirë për huamarrje të reja.
Nga Qendra për informatikë e ASHAM-it, sqaruan se pse e kanë tërhequr matësin
“Tërheqja e aplikacionit nuk ka të bëjë me reagimin e VMRO-DPMNE-së. Aplikacioni është tërhequr për shkak se ende nuk ka përfunduar dhe nuk është e dedikuar për opinionin”, tha akademik Lupço Kocarev.
Matësi ekzistonte thuajse 24 orë. Derisa punonte mati se borxhi publik arrin 49,18 për qind të Bruto Prodhimi Vendor.
