Udhëheqësi i Bankës Evropiane për Rindërtim dhe Zhvillim (BERZH) ka thënë se ai pret që institucioni ndërkombëtar financiar do të investojë më shumë fonde në Evropën Qendrore dhe ish republikat sovjetike.
Duke folur në takimin vjetor të kësaj banke që është mbajtur mbrëmë në kryeqytetin e Gjeorgjisë, Tbilisi, presidenti i BERZH-it, Suma Chakrabarti, ka thënë se banka është e gatshme të investojë më shumë në vendet që janë goditur nga kriza financiare dhe ekonomike ruse.
“Ajo që ka ndodhur në ekonominë ruse ka ndikuar shumë në Kaukaz, por edhe në Azinë Qendrore, prandaj pres që të investohet më shumë”, ka thënë ai.
Por, ai e ka përjashtuar mundësinë e investimeve të reja në Rusi duke thënë, “duhet të shohim se si do të rrjedhë situata gjeopolitike para se të vendosim nëse do të kthehemi në Rusi me projekte të reja”.
Në korrik të vitit të kaluar, BERZH ka ngrirë investimet e reja në Rusi si pjesë e sanksioneve perëndimore për shkak të krizës në Ukrainë. /Telegrafi/