Bernard Berisha e ka nisur për mrekulli kampionatin rus pas pauzës tre mujore.
Ylli i Përfaqësueses së Kosovës ka shënuar gol në fitoren e madhe që skuadra e tij e arriti si mysafir tek Krylya 2-4.
Berisha ishte në fushë nga minuta e parë së bashku me reprezentuesin e Shqipërisë, Odise Roshi.
Pikërisht bashkëpunimi i dy shqiptarëve në minutën e 69-të ishte shumë i suksesshëm, kur Roshi asistoi për pejanin i cili shënoi nga afërsia golin e katërt për skuadrën e tij.
Për Berishën ky ishte goli i tretë në këtë kampionat, teksa Roshi deri më tani ka shënuar pesë gola.
Akhmat mori një fitore të madhe në udhëtim te Krylya, pasi me këtë tre pikësh i iku edhe fundit të tabelës.
Pas 23 ndeshjeve të zhvilluara në Superligën e Rusisë, Akham zë pozitën e 13-të në tabelë me 23 pikë të tubuara.
Ndeshjen e ardhshme Bernard Berisha dhe Odise Roshi me bashkëlojtarët e tyre presin Sochin në shtëpi. /Telegrafi/