Këshilltari i ish-kryeministrit Isa Mustafa dhe avokati, Besnik Berisha, në emisionin “Debat D Plus” në RTV Dukagjini ka thënë se shfuqizimi i Gjykatës Speciales do kishte pasoja të papërballueshme për liderët politikë.
Berisha ka thënë se për Gjykatën Speciale është debatuar, por ai tha se nuk pajtohet se faji i bie UNMIK-ut dhe EULEX-it në tërësi.
Ai thotë se kur Dick Marty akuzonte dhe alarmonte Këshillin e Evropës për krime dhe trafikim organesh institucionet e Kosovës asokohe nuk kërkonin dhe EULEX-i dhe organet e tjera të Kosovës të zbardhen të gjeturat e atij raporti, por kërcënonin Dick Marty-n.
Berisha, duke folur për Gjykatën Speciale, tha se nuk beson bllanko se do të jetë një gjykatë e pavarur e paanshme dhe objektive dhe se nuk do të ndikohet nga Serbia.
“Por gabimi më i madh do të ishte të pretendohet të shfuqizohet kjo gjykatë. Nuk mund t’i dalim botës përpara duke pretenduar se po shfuqizojmë një ligj- gjykatë që gjykon krimet kundër njerëzimit”, tha ai.
Më tej Berisha tha se është e pamundur shfuqizimi i Speciales, jo për shkak të votave në Kuvend, por për shkak të pasojave të papërballueshme për liderët tanë. /Telegrafi/
