Ish-kryeministri Sali Berisha ka shprehur ngushëllimet për vdekjen e shkrimtarit të madh Ismail Kadare. “Dielli perëndoi përgjithmonë për gjeniun botëror të letrave”, shkroi Berisha në një postim në Facebook.
“Të dashur miq, sot mort, zi dhe dhimbje për mbarë kombin shqiptar. Ismail Kadare, gjeniu botëror i letrave shqipe, dhe njërit prej shkrimtarëve më të mëdhenj të kohës, mbylli sytë përgjithmonë për të mbetur për jetë i pavdekshëm në Olimpin e veprave të tij. Laurat i çmimeve më prestigjiozë të letrave si Man Booker, Prince des Asturies, Jerusalem Prize, veprat e Ismail Kadaresë u përkthyen në rreth 45 gjuhë të botës”.
“Në kohërat më të errëta të regjimit hoxhist kur me një varg apo poezi mund të hapje varrin tënd, me gjithë konformizmin që kishte si alternativen me te mire burgun dhe internimin, Ismail Kadare arriti të dalë nga shtrati i Prokustit me vepra si “Pallati i Ëndrrave” etj. për të cilat regjimi e censuroi për vite të tëra. Në vitin ‘90 Ismail Kadare ishte një avokat i lirive dhe të drejtave të njeriut dhe hapjes së Shqipërisë. Ai pas largimit nga Shqipëria, nga mërgimi në Paris mbështeti Lëvizjen Studentore dhe Revolucionin Demokratik që përmbysi diktaturën komuniste në Shqipëri.
Duke u përulur me nderimin më të madh dhe mirënjohjen më të thellë para kujtimit dhe veprës të ndritur të Ismail Kadaresë, shpreh ngushëllimet e mia më të ndjera familjes së tij të nderuar miqve, të afërmeve dhe lutem së bashku me ta që shpirti i madh i tij të prehet në paqen e merituar. Amin!”. /Telegrafi/