Kompania Quantix ka lansuar më 28 prill softuerin që bazohet në Inteligjencë Artificiale, përmes së cilit gjuha shqipe do të transkriptohet në mënyrë automatike nga përmbajtjet audio-vizuale në forma të tekstit të shkruar.
Për më tepër se kaq, teksti do të shkarkohet i gatshëm në disa forma të përshtatshme për t’u përdorur në media, gjykata apo institucione të tjera shtetërore.
E gjithë kjo është mundësuar falë një pune më shumë se 3-vjeçare në kuadër te projektit “Albanian Speech to Text”, për te cilën kompania ka investuar në shumë sfera të teknologjisë, sikurse njohuri, serverë të avancuar dhe përmbajtje.
Të ftuara në një emision televiziv, Blinera Fazlija dhe Vesa Berdyna nga kjo kompani shpalosën më shumë informacione rreth Shqip.ai, që tanimë është platforma më e kërkuar në tregun e Kosovës dhe më gjerë.
Ato theksuan se platforma ka filluar zhvillimin e saj qysh para 4 vitesh dhe që nga java e kaluar ka pasur një interes të jashtëzakonshëm nga publiku.
“Platforma ofron transkriptim të zërit të folësve në gjuhën shqipe, me një saktësi prej mbi 90 për qind dhe është testuar tashmë në fusha prej më të ndryshmeve, si nga kompania, si nga tashmë përdoruesit e Shqip.ai. Për të arritur këtë saktësi, përdoruesit duhet të kenë kujdes që të mos ketë shumë zhurmë dhe që audio të jetë i pastër”, tha Blinera.
Ajo po ashtu shtoi se përveç institucioneve publike ku fokusi ka qenë më i madh, Shqip.ai ka parë një interes jashtëzakonisht të madh edhe në fusha të ndryshme duke i theksuar individët dhe kompanitë e përfshira në hulumtim, media, krijimtari publicistike dhe content creators të rrjeteve sociale.
Ndërsa, pjesëtarja tjetër e ekipit, Vesa tha se ideja e përdorimit të platformës është që të gjithë ata që mund të përfitojnë nga ky produkt ta përdorin atë, pra gjen përdorim në të gjitha fushat.
Ajo me tej theksoi se përdorimi i Shqip.ai do ta përmirësonte dukshëm cilësinë e punës edhe në Kuvend.
E në një intervistë tjetër, Alba Kelmendi dhe Gresa Klinaku nga Shqip.ai folën për fillimet e vështira të platformës.
Ato u shprehën se fillimisht kanë punuar shumë persona për të lexuar dhe dalluar theksin në materiale, dhe pastaj u krye validimi i të gjitha të dhënave.
“Një sfidë kryesore ishte mungesa e materialeve në gjuhën shqipe, pasi ajo është një nga gjuhët më të vështirat në botë”, tha Alba duke shtuar se lokalizmat nga Shqip.ai kanë treguar sukses në transkriptim.
Ndërsa, Gresa theksoi se platforma Shqip.ai ka qasje për të gjithë dhe ka gjetur përdorim në Qeveri, kuvende komunale, marketing, media e universitete.
“Një pyetje që është ngritur është nëse Shqip.ai do të lërë njerëzit pa punë. Përgjigja është se platforma nuk e lë njerëzit pa punë, por lehtëson punën, ofron mundësi për produktivitet dhe bën jetën më të lehtë për të gjithë përdoruesit”, u shpreh mes tjerash ajo.
Gjatë intervistës u përmend se për momentin të gjithë ata që aplikojnë për përdorim, do të kenë minuta falas për ta provuar Shqip.ai, dhe se strategjia e çmimit në afat të gjatë për të interesuarit do jetë e përballueshme.