Ushtria e Serbisë është gati për të festuar ditën e çlirimit të Beogradit. Dhe për këtë ditë, autoritetet u kanë bërë thirrje të gjithëve në Serbi që të shkojnë në aeroportin “Batajnicki” dhe së bashku me ushtrinë të festojnë këtë “ditë të rëndësishme”.
Sipas asaj që shkruajnë mediat serbe, përcjell Telegrafi, në këtë program të quajtur “Sloboda 2017” do të paraqiten pajisjet më të mira dhe ushtarët më të trajnuar të Forcave të Armatosura të Serbisë.
Po sipas mediave serbe, është planifikuar që në programin “Sloboda 2017” të përfshihen 2.200 anëtarë të ushtrisë, 130 automjete të ndryshme dhe 30 avionë e helikopterë.
Pranë “Mig”-ëve rusë thuhet se do të vendosen 1.500 ushtarë specialë të forcave të ushtrisë serbe, të cilët mediat serbe i quajnë “Luftëtarët e Shekullit 21”.
Ata thuhet se do të prezantojnë pajisje të reja, që nga pajisjet optike deri te pushkët.
Ata do të vendosen në njësi të ndryshme dhe paraqesin të ashtuquajturat forca speciale që fillimisht mblidhen dhe reagojnë në situata të jashtëzakonshme. /Telegrafi/
