Doktorët e Real Madridit po vazhdojnë me lajme jo të mirë këtë sezon, së fundi për Karim Benzeman, i cili pësoi frakturë në gishtin e vogël të dorës së djathtë në ndeshjen ndaj Betisit.
Kështu francezi i bashkohet sulmuesve tjetër të lënduar: Marco Asensio, Gareth Bale dhe Mariano Diaz.
Ende nuk dihet se sa do të mungojë 31-vjeçari, por Marca raporton se shpresat e para janë se lojtari nuk pritet t’i nënshtrohet një operimi, tregues që nuk do të mungojë gjatë.
Benzema mbërriti të hënën në qendrën stërvitore të klubit me dorën e fashuar, para se të vazhdonte pastaj për teste mjekësore më të detajuara.
Real Madridi ka konfirmuar lëndimin e lojtarit, por ende periudhën se sa do të mungojë pasi është duke pritur përgjigje nga mjekët specialistë.
Vlen të theksohet se të lënduar te Los Blancos janë edhe Thibaut Courtois, Marcos Llorente dhe Toni Kroos.
Aktualisht Reali renditet në vendin e katër në La Liga, ndërsa në xhiron e radhës luan kundër Sevillas. /Telegrafi/