Ministri i Ekonomisë Kreshnik Bekteshi, sot ka folur në lidhje me masat e reja anti-krizë që i ka paralajmëruar Qeveria.
Ai deklaroi se me masat e reja nuk do të mbështeten minierat, kazinotë, bankat dhe aktivitete të ngjashme.
Bekteshi ritheksoi se do të ndihmohen kategoritë më të rrezikuara të qytetarëve dhe do të merren masat e duhura për ngrirjen e çmimeve dhe marzhet.
“Biznesi do të ndihmohet drejtpërdrejt, por ata sektorë që kanë vërtet nevojë. Unë kam thënë se ata sipërmarrës që tregojnë se realisht kursejnë dhe ata që vërtet kanë nevojë për mbështetje do të marrin mbështetje nga Qeveria. Nuk besoj se disa kompani që vitin e kaluar kanë pasur fitime mbi 30 milionë euro, që kanë pasuri minerale dhe që përdorin të mira publike nga të gjithë qytetarët, të kenë nevojë për mbështetje. Ne i kemi ato të dhëna dhe po merren masat”, tha Bekteshi.
Sipas Bekteshit, disa hotele janë në tregun e rregulluar dhe kanë çmim të garantuar të energjisë elektrike deri më 31 dhjetor, ndërsa për ato në tregun e lirë, qeveria do të dalë me propozime konkrete për uljen e kostos së energjisë elektrike deri në fund të kësaj jave.