Kryetari i Komunës së Gostivarit, Nevzat Bejta, sot ka pritur në takim një delegacion të misionit të OSBE-së në Shkup, të udhëhequr nga zv.ambasadori Geffry Golstein. Gjatë takimit, siç thuhet në kumtesë, u bisedua rreth marrëdhënieve ndëretnike, me ç’rast Bejta nënvizoi që në Gostivar jetojnë shqiptarë, maqedonas, turq, romë dhe etni të tjera, përcjell Telegrafi Maqedoni.
“Historikisht bashkëjetesa ka qenë dhe është pasuri e çmuar e qytetarëve të Gostivarit të cilët jetojnë në harmoni të plotë mes veti dhe pa dallime etnike dhe religjioze. Gostivari është qyteti i miqve, është qytet që veçohet nga vendbanimet e tjera edhe për nga bashkëjetesa mes etnive të ndryshme”, tha kryetari Nevzat Bejta, duke folur për historikun dhe të tashmen e qytetit.
Në takimin me drejtuesit e misionit të OSBE-së në Shkup, u diskutua rreth aktiviteteve dhe projekteve të realizuara dhe që pritet të realizohen brenda kohës nga ana e Komunës së Gostivarit./Telegrafi/