Ashtu edhe siç ishte njoftuar, sot (e premte) para objektit të Ministrisë së Kulturës, Rinisë dhe Sportit, janë bërë homazhe në nderim të këngëtares dhe gazetares tashmë të ndjerë, Violeta Rexhepagiqi.
Ajo ndërroi jetë mëngjesin e së enjtes, në rrethana që ende po hetohen nga Policia e Kosovës.
Ndonëse në një kohë krize të pandemisë globale, mes distancën e ruajtur dhe respektimin e rregullave, qytetarët kanë bërë homazhe të premten para MKRS-së.
Ministrja në detyrë, Vlora Dumoshi, çmoi lartë vlerat e Violetës si artiste, duke përkujtuar veprimtarinë e saj muzikore bashkë me stafin e MKRS-së.
“Ajo me zërin dhe dukjen e saj dhe gjithmonë na ka dhënë mesazh vajzave dhe grave të reja që duhet t’i thyejmë të gjitha tabutë dhe të depërtojmë si vajza dhe si gra”, u shpreh ndër të tjera ministrja, duke konsideruar se sado simbolike, kjo ceremoni shkon për kujtimin e veprës së saj, e cila përjetësisht do të mbetet një emër i paharruar për artin dhe kulturën e Kosovës dhe më gjerë”, tha Dumoshi.
E njëjta bëri të ditur se në përkujtim të karrierës së bujshme të së ndjerës në muzikë, këngët e Violeta Rexhepagiqit do të lëshohen gjatë gjithë ditës së premte para Ministrisë së Kulturës.
“Me këtë rast i ngushëlloj të gjithë artistët të gjithë kolegët e saj në veçanti familjen e cila e humbi motrën dhe ne do t’u rrimë për krah në forma të ndryshme që sado pak t’i ngushëllojmë në këtë kohë pandemie, pasi nuk ka ndonjë mundësi tjetër që përcjellja e saj të jetë ashtu siç ajo e ka merituar”, ka thënë Vlora Dumoshi. /Telegrafi/
