Familja e David Beckham e ka vizituar restorantin e kuzhinierit të famshëm, Nusret Gokce, në New York.
Ish-futbollisti anglez së bashku me djemtë Romeo Beckham e Cruz Beckham dhe vajzën Harper Beckham janë fascinuar nga aftësitë e turkut të popullarizuar në përgatitjen e mishit.
Në një video të publikuar në profilin e Nusretit në Instagram, ku numëron mbi 11.2 milionë ndjekës, shfaqet ai duke ua përgatitur mishin mysafirëve të tij të famshëm.
Ndërsa në momentin e hedhjes së kripës përfshihen edhe fëmijët e Beckham, të cilët shfrytëzojnë stilin e veçantë ‘Salt Bae’ për kriposje.
Një video nga vizita e tij në restorantin e Nusretit e ka publikuar edhe vet Beckham në profilin e tij në Instagram.
42-vjeçari shihet duke e vështruar me kërshëri mjeshtrin e Gokces në përgatitjen dhe prerjen e mishit.
“Faleminderit për drekën e shkëlqyer… Ishte një kënaqësi të të njihja Nusret dhe ishte një përvojë mbresëlënëse”, ka shkruar ish-futbollisti anglez.
Nusret Gokce është bërë i njohur në gjithë botën me nofkën Salt Bae, për shkak të mënyrës së tij të veçantë të kriposjes së mishit, ndërsa tash është një shef kuzhine dhe pronar i një rrjeti restorantesh me emrin “Nusr-Et”.
Fama e Gokces u rrit jashtëzakonisht shumë në vitin e kaluar edhe për mënyrën e prerjes së mishit, derisa arti i tij i gatimit dhe përgatitjes së mishit është bërë sensacion në rrjetet sociale. 34-vjeçari tashmë është bërë një yll në rrjetet sociale, ndërsa videot që i poston shikohen me miliona herë dhe marrin qindra mijëra pëlqime.
Restorantin e parë e kishte hapur në Stamboll (2010), ndërsa pas dy vitesh e zgjeroi biznesin në Dubai. Një vit më pas, shkoi edhe në Abu Dhabi, ndërsa ka hapur restorante edhe në kryeqendrat tjera botërore, si Ankara, Miami e New York. /Telegrafi/