Mediumet theksojnë se përfaqësuesit e delegacionit grek në Bruksel, të kryesuar nga kryeministri Jorgos Papandreu, deklaruan se nuk përjashtohet mundësia që Greqia të kërkojë ndihmë financiare nga Unioni.
Çështja për problemin financiar të Greqisë u gjend në rendin jozyrtar të ditës, në ditën e parë të Këshillit Evropian, pasi që paraprakisht këtë javë, agjencia ndërkombëtare e rejtingut "Fiç" e uli rejtingun kreditor të vendit në nivelin më të ulët në eurozonë.
"Greqia duhet së pari vetë të ndërmarrë hapa të drejtë", theksoi ministri gjerman i Financave, Volfgang Shojble.
Paraprakisht, liderët e BE-së e hodhën poshtë mundësinë për bankrotim të Greqisë.
"Ekzistojnë disa supozime se vendi është para bankrotit, por unë personalisht nuk kam vërejtur diçka të tillë", deklaroi kryeministri i Luksemburgut, Zhan-Klod Junker.
Kancelarja gjermane, Angela Merkel, gjithashtu e hodhi poshtë mundësinë e tillë, duke sqaruar se problemi e godet tërë Unionin.
Brengosja lidhur me financat shtetërore të Greqisë janë shtuar pasi që Qeveria e re e Jorgos Papandreut kumtoi se këtë vit, deficiti buxhetor do të jetë shumë më i lartë nga ai që pritet dhe do të arrijë rreth 12,7 për qind nga bruto prodhimi vendor i shtetit.