Plani, thonë zyrtarët, është i nevojshëm për të shmangur ciklin e shtimit të papunësisë dhe të rënies së kërkesës së konsumatorëve.
Ai parashikon ule taksash dhe investime të fokusuara në industrinë e ndërtimit dhe atë të prodhimit të makinave në vlerë 170 miliardë dollarë.
Komisioni thotë se plani duhet të zbatohet në të 27 vendet anëtare të bllokut që të japë rezultatet maksimale.
Korrespondenti i BBC-së Për Evropën, Mark Mardell thotë se plani në thelb, nuk ka të bëjë me shpenzime nga ndonjë arkë e përbashkët evropiane.
Masa të përbashkëta
Komisioni e hartoi planin pas kërkesës që i është bërë nga krerët e shteteve anëtare për të dalë me një plan të përbashkët shpëtimi.
Komisioni pritet t’u bëjë thirrje 27 vendeve me ekonomi shumë të ndryshme, që të koordinojnë marrjen e masave të përbashkëta.
Në thelb të planit është inkurajimi i uljes së taksave dhe investimet e fokusuara në degë të caktuara, në vlerë rreth 170 miliardë dollarë, rreth 1 përqind të GDP-së së BE-së.
Komisioni sugjeron që zvogëlimi i taksave mund të jetë zvoglëlimi i TVSH-së apo i taksave të punës, ndërkohë që thotë se investimet duhet të fokusohen tek sektorët e ndërtimtarisë dhe prodhimit të makinave.
Theksi vihet tek bashkëveprimi mes 27 vendeve anëtare, pjesërisht në mënyrë që askush të mos përfitojë në mënyrë të padrejtë prej planit.
Një arsye tjetër është se Komisioni shpreson që veprimi i koordinuar të ketë ndikim pozitiv më të madh në gjithë ekonominë e Evropës.