Për Bashkimin Evropian dhe Bankën Botërore, bujqësia është sektori me më së shumti suksese në ekonomi dhe në zbatimin e reformave e politikave të planifikuara. Në një analizë të përbashkët të tyre për sfidat e zhvillimit, për përshpejtimin e rritjes, gjenerimin e punësimit dhe stabilitetin makro-financiar, Bashkimi Evropian dhe Banka Botërore, thonë se bujqësia ka potencial për të qenë një nga motorët e rritjes në një periudhë afatshkurte dhe afatmesme.
“Duke u bazuar në sukseset e fundit në rritjen e produktivitetit të sektorit bujqësor dhe agropërpunimit – përfshirë zbatimin e reformave të synuara dhe politikave që kanë për qëllim lehtësimin e formalizimit të aktiviteteve bujqësore dhe lidhjet e fermerëve me tregjet në Kosovë dhe jashtë saj – mund të ndihmojë që popullsisë rurale t’i ofrohen perspektiva ekonomike ndjeshëm të përmirësuara”, thuhet në këtë dokument zyrtar të përbashkët të tyre.
Bujqësia, sipas Bashkimit Evropian dhe Bankës Botërore, është punëdhënësi më i madh privat në Kosovë dhe kontribuesi kryesor në GDP kombëtare.
“Derisa qeveria ka ndërmarrë disa nisma të rëndësishme dhe strategjike për të adresuar këto sfida, një agjendë e madhe e papërfunduar mbetet. Agjenda e përgjithshme e zhvillimit në sektorin e bujqësisë në Kosovë është e shtyrë kryesisht nga perspektivat për integrimin përfundimtar në BE. Kapitulli i bujqësisë është një nga kapitujt më të kërkuar dhe të vështirë të acquis communautaire të BE-së”, thuhet në këtë dokument, sipas të cilit bujqësia është sektor kyç i ekonomisë së Kosovës, por ajo është e mbushur me plot sfida sistematike dhe strukturore që duhet të adresohen për të shfrytëzuar potencialet e saj konkurruese dhe të rritjes.
Një sugjerim të tillë e kishte dhënë kohë më parë edhe vet menaxheri i zyrës së Bankës Botërore në Kosovë, Jan Peter Olters. Ai kishte thënë se po të mos ishte rritja e zhvillimit të sektorit të bujqësisë, Kosova nuk do të mund të arrinte as 2 për qind të rritjes ekonomike./Telegrafi/