Ekzistojnë plane që aeroporti Ecka pranë Zrenjaninit në Serbi të shndërrohet në bazën e dytë ruse në Serbi, pas qendrës humanitare në Nish, raportojnë mediat serbe.
Ideja është që në këtë vend të ndërtohet një qendër trajnimi, një terren trajnimi për njerëzit që veprojnë në situata të jashtëzakonshme, derisa Moska është shprehur e gatshme të ndajë një shumë të konsiderueshme të fondeve për këtë projekt, transmeton Telegrafi.
Kjo temë duhet të jetë pjesë e bisedimeve zyrtare mes Beogradit dhe Moskës gjatë vizitës së kryeministrit rus Dmitri Medvedev, i cili sipas medieve serbe fillimisht do të kërkojë verifikimin e marrëveshjes për privilegje të veçanta diplomatike në qendrën humanitare serbo-ruse në Nish, e cila është në pritje që nga viti 2014.
Megjithatë, autoritetet në Beograd me kujdes të madh janë duke vepruar sa i përket kësaj çështje, duke marrë parasysh se ekzistenca e bazës në Nish tashmë nuk shikohet me sy të mirë nga Brukseli dhe Uashingtoni.
Burime të përditshmes serbe “Blic” brenda qeverisë, pretendojnë se është duke u kërkuar një mënyrë që të zgjidhet kjo, pa rrezikuar integrimin evropian por edhe pa prishur marrëdhëniet me Rusinë. /Telegrafi/