Teksa po i afrohemi çdo ditë e më shumë afatit veror të transferimeve, spekulimet lidhur me të ardhmen e Alphonso Davies po vazhdojnë të rriten mes interesimit të fortë nga ana e Real Madridit.
23-vjeçari i cili aktivizohet në pozitën e mbrojtësit të majtë, është objektivi kryesor i afatit kalimtar për ‘Los Blancos’ dhe ata tashmë janë duke punuar për transferimin e tij.
Bisedime të reja mes dy palëve do të mbahen
Gazetari Florian Plettenberg raporton se kampioni në fuqi i Gjermanisë ka planifikuar të mbajë bisedime të reja me kampin e Davies për të diskutuar rreth kontratës.
Bavarezët po i ofrojnë kanadezit një kontratë afatgjatë deri në 2029 me rritje të pagës, ku sipas kontratës së re ai do fitonte 11-13 milionë euro në vit.
Sidoqoftë, lojtari dhe kampi i tij nuk janë tërhequr nga kërkesat e tyre dhe po synojnë që të marrin 20 milionë euro në sezon. Në rast se dy palët nuk arrijnë të gjejnë gjuhën e përbashkët, atëherë ‘Die Roten’ do të shesë Daviesin gjatë verës.
Real Madridi nuk do të shpenzojë shuma të mëdha parash për Davies
Më herët ishte raportuar që në rast shitjeje, Bayern Munichu me gjasë do të kërkonte 60-70 milionë euro për kartonin e Davies, shumë të cilën Real Madridi nuk e ka për qëllim që ta paguajë.
Duke marrë parasysh faktin që Davies po hyn në vitin e tij të fundit të kontratës, ‘Los Blancos’ e shohin këtë shumë si të ekzagjeruar.
Për më shumë, raportimet nga Spanja nënvizojnë se lideri aktual i La Ligës nuk do të ofrojë më shumë se 40 milionë euro për kartonin e tij./Telegrafi/