Juventus, Manchester United dhe Liverpool duket se kanë humbur garën për mesfushorin Ryan Gravenberch, pasi lojtari i Ajax ka rënë dakord për një transferim te Bayern Munich për 28 milionë euro.
Reprezentuesi holandez mbush 20 vjeç muajin e ardhshëm dhe është produkt i akademisë së Ajaxit.
Ai ka qenë i lidhur me shumë klube evropiane gjatë muajve të fundit, duke përfshirë Juventusin, Manchester Unitedin, Liverpoolin dhe Real Madridin.
Gazetari Alfredo Pedulla shkruan se Gravenberch ka zgjedhur Bayern Munichun si destinacionin e tij të ardhshëm.
Ajax gjithashtu ka rënë dakord me Bayernin për 28 milionë euro.
Gravenberch do të fitojë 4.3 milionë euro në sezon plus bonuse me klubin nga Bundesliga.
Adoleshenti tashmë ka 10 ndeshje për Holandën, ndërsa këtë sezon te Ajaxi ka luajtur 38 ndeshje.
Bayern Munich gjithashtu po puno edhe për mbrojtësin Noussair Mazraoui, kontrata e të cilit do të skadojë më 30 qershor. /Telegrafi/